Rebelët Huthi të Jemenit kanë kryer sulme me raketa ndaj Izraelit të shtunën. Grupi, i mbështetur nga Irani, ka paralajmëruar për sulme të mëtejshme në ditët e ardhshme, ndërsa pothuajse i gjithë rajoni është përballur me sulme të përsëritura gjatë 24 orëve të fundit.

Qeveria e njohur ndërkombëtarisht e Jemenit ka dënuar ato që i konsideron përpjekje të Iranit për të tërhequr vendin në konflikt. Nëse Huthitë synojnë anijet që lundrojnë përmes ngushticës Bab al-Mandab në skajin jugor të Detit të Kuq, kjo mund të ndikojë ndjeshëm në ekonominë globale.

Forcat Mbrojtëse të Izraelit (IDF) njoftuan se kanë kryer një valë tjetër sulmesh ndaj Teheranit, duke goditur qendra të përkohshme komande dhe vendet e prodhimit të armëve. Sipas tyre, disa qendra komande iraniane u zhvendosën në njësi mobile pas goditjeve të mëparshme, dhe disa prej tyre u shkatërruan së bashku me komandantët në selinë qendrore.

Të shtunën, Emiratet e Bashkuara Arabe përjetuan numrin më të madh të sulmeve me raketa balistike në javë të tëra. Fabrika kryesore e Emirates Global Aluminium në Abu Dhabi u dëmtua ndjeshëm, duke plagosur disa punonjës, ndërsa Aluminium Bahrain, një nga prodhuesit më të mëdhenj të aluminit në botë, u sulmua gjithashtu. Në Kuvajt, sistemi i radarit në aeroportin ndërkombëtar pësoi dëmtime të konsiderueshme.

Shtetet e Bashkuara kanë dërguar rreth 3,500 persona në rajon me anijen luftarake USS Tripoli, ndërsa Pentagoni po përgatitet prej javësh për operacione tokësore në Iran, sipas raportimeve të gazetës Washington Post.

Ndërkohë, ministrat e jashtëm të Arabisë Saudite, Egjiptit, Pakistanit dhe Turqisë po mbajnë takime në Islamabad për të diskutuar mënyrat për uljen e tensioneve në rajon. Bisedimet pritet të vazhdojnë edhe të hënën.

/rtk